මජං අතින් ලියූ කවිය
_______________________

හැර දමා ගම්බිම්
කොන්ක්‍රීට් පුරවරේ පදම් වී
තිස් අවුරුද්දක් ම ගෙවුණා

පාසලට පොත පතට
ආයුබෝවන් කියා
එක් පොතක් වත් නැතුව
හෝඩියෙන් ජීවිතය ඇරඹුවා
අත පයේ තෙල් මජං ගෑවුණා

මා සොයා ගෙන ඇවිත්
වෙහෙසකර පණිවිඩය
පෙරේදා රාත්‍රියෙ ලැබුණා
මජං හෝදා ගන්න
අත අහවරක් නොවුණා
ඊයෙ අද දෙදොහේ ම
දෙගොඩහරි ජාමයෙත්
වැඩ පිරී තිබුණා
මුදලාලිගේ දෑහ
අන්දකාරෙත් දිලිහුණා

ගුරු පුදයෙ ගුණ වරුණෙ
ටීවී එකේ ඇහුණා
ෆොටෝ එක පත්තරේ තිබුණා
ගුරු මණ්ඩලේ සිනාසෙනු බැරුව හිටියා
මුල් ගුරුතුමා කොහෙද
මගේ හිත ඇහුවා
දැක ගන්න තිබුණනම් හොදයි
හිත ඇතුලෙ හීනයක්
කාලයක් තිස්සේ ම තිබුණා

හැඩට ඔසරිය ඇන්ද
හෝඩියේ ගුරුතුමිය
රෙද්ද බැනියම ඇන්ද
පස්වැන්නෙ ගුරුතුමා
අනේ මා හොයන්නැති
පංතියේ කීකොරුම සිස්සයා
ඇඳීමට ලිවීමට දස්සයා
කතා නැති නිස්සද්දයා

ගෝලයන් ගේ කාර්
පේළියට තියෙන්නැති 
මන්තිරිල, දොස්තරල,ලෝයස්ල
එන්න ඇති
කාටවත් මා මතක නැතුවැති
බාටදෙකක්වත් නැතුව
පාසලට පයින් ආ හාදයා
සිස්සත්ව විබාගෙන්
අනූවක් ලකුණු ගත් සූරයා

ගුරු මව්නි පියවරුනි
කියා දුන් අකුරු මට තාම මතකයි
පාඩමක් දෙකක් වැරදී
පාර වැරදුනා තමයි
ඒත් හිතට දුක නැතුවා සත්තමයි

දෙපා වදින්නට නාවට
මෙමට සමා වේදැයි
මජං පිස නොදා ලියු පද
ඊට හිලව් වේදැයි
___________

සු.ප්‍රි.සමරසිංහ